بجد مش عارفه
هاجس الخوف والقلق شغال معايا
اكتب ماكتبش
اكتب ماكتبش
مش عارفه اقرر
حاسه انى كده هبقى زى الى فضح نفسه بنفسه والى ممكن كان يعرفه عشره بقى يعرفه ملايين
بجد مش عارفه اذا كنت اكمل فى المدونه ولا الغيها
خوفى من ان حد يعرف شخصيتى مسببلى حاله قلق وحشه
مخليانى مش عارفه اقرر
احيانا اقول هكتب ومحدش هيعرف شخصيتى واحيانا اقول لا مش هاكتب وهدنى ساكته
ومحدش يعرف عنى وخلينى كده
مش ليها لازمه دول كانوا حبه اكتئاب وهيرحوا لحالهم
بلاش قله عقل
بدل ما ارجع اندم تانى
حقيقى شئ محير
بس انا عندى رغبه فى انى اكتب مش عارفه ليه
ادينى هجرب ومش هخسر حاجه وخلاص
فى البدايه انا عمرى ماكنت شخصيه متشائمه ولا بتبص للدنيا بمنظار اسود بالعكس انا شخصيه متفائله جدا وبحب الدنيا
بس للاسف معرفش احيانا بتجيلى حالات اكتئاب بتخلى تفكيرى سوداوى قوى اى نعم بخرج منها بسرعه بس بتبقى لحظات قاتله صراحه
مش عارفه ابدء منين ؟؟
خلينى اتكلم عن مشكلتى
بدايه مشكلتى فى بيت مافيهوش توافق ابدا
نادرا لما يكون فيه توافق ولما بيحصل توافق مش بيدوم طويلا
ممكن يدوم دقايق وممكن اقصاها كام يوم علشان يبدء بعدها عدم التوافق
اب وام مافيش بينهم ادنى انواع التفاهم خلفوا عيال لمجرد الخلفه مش اكتر او يمكن علشان الناس كلها بتخلف
اتربينا على اسس عجيبه يمكن تكون بعيده عن الدين كلها كانت نابعه من الصح والغلط والعيب
وفى مرحله لاحقه من حياتنا بدء موضوع الحرام والحرام والاصول والعادات والتقاليد
علشان كده انا واغلب اخواتى مرحله التدين معانا جت متاخر ويمكن جت من نفسها كل واحد لاقى نفسه انه لازم يقرب بقى من ربنا كفايه كده
صراحه عدم توافق الاب والام فى البيت عمل مشاكل كبيره جدا وتوابع لدرجه انى احيانا بحس ان ربنا غضبان علينا بجد اغلب المشاكل الى فى البيت بسبب عدم توافق اب وام
انا الصراحه مش عارفه كملوا مع بعض ليه بيقلوا علشانا احنا اكتر ناس اضرينا من استمرارهم سوا
يمكن لو كانوا انفصلوا زمان كنا ارتحنا او حتى انفصلوا قبل ما نيجى للدنيا
غلطان اى اب وام بيبقى بينهم مشاكل ومش قادرين يتوافقوا انهم يكملوا بس علشان خاطر الابناء
لان الى بيحصل ان الابناء دى بتبقى اكتر ناس مضروره من الوضع ده
انا احيانا بتيجى عليا لحظات بقول يارتهم ينفصلوا ونرتاح
واوقات تانيه بقول لعل الله يتوفاهم
انا عارفه ان التفكير ده مش كويس ووحش قووى
وعارفه كمان ان وجودهم رحمه لينا من حاجات كتير فى علم الغيب ما عرفهاش بس بجد الواحد تعب
وعارفه كمان ان التفكير ده صادم جداا للكتير من الناس وخاصه الاباء والامهات
انا عارفه
انا حاسه بصعوبته وحاطه نفسى فى مكانهم بيقول لو انا ليا اب ومن جواه بيتمنى موتى اكيد هتبقى صعبه قوووووووووى وفوق الاحتمال
بس حقيقى مش قادره
احيانا بقول
انا هبقى عامله زى الى مستنيه القشه الى تقطم ظهر البعير
اه يعنى حاسه انى فى اى لحظه ممكن انفجر ممكن اسيب البيت
انا عارفه انه حل غير مقبول بالمره وانه مش مطروح اصلا
بس مخ الواحد ساعات بيشت مع نفسه ويفكر فى حاجات غريبه
والله انا مش كارهاهم بس كاره تصرفاتهم واسلوبهم
فى اوقات تعبهم واوقات ضعهم بيصعبوا عليا جداااا
واقول انا حياتى هتكون ازاى من غيرهم اكيد هتبقى اصعب
ولما بيشدوا حيلهم وتبدء المعارك من اول وجديد
تفكيرى بيشت تانى
احيانا بتجيى فى بالى الايه الى بتقول
ولا تدرى نفس باى ارض تموت
وكمان محدش عارف مين هيموت قبل مين
مش جايز انا الى اموت قبلهم
شئ وارد جداا ومش بعيد وحصلت كتير
صراحه خايفه ليكون شعورى ده ربنا ممكن يحاسبنى عليه
بس حقيقى انا مش بعاملهم وحش ولا حاجه بالعكس انا بحاول على قد ما اقدر اراعى ربنا فيهم
انا مش بقول انى ابنه مثاليه لا بس بحاول على قد ما اقدر انى اكون مثاليه
بس مشاعرى مش قادره اتحكم فيها .
حاجه اخيره بجد يا جماعه الى يقرى كلامى ده وشايف انى مش لازم اكتبه يقول بصراحه وانا هقفل المدونه وده وعد
